Jedes Johr in unser Häusle
kommt zur Weihnachtszeit a Mäusle.
Mr woiß vom Weihnachtsmäusle wenig,
doch wenn es do isch, isch's dr König.

Auf Weihnachtsguatsle ischs versessa,
drom hot's uns noch koi Johr vergessa.
Es hält ons für dr Weihnachtsbäck
ond drom verschmäht's au Wurscht ond Speck.

Am liebschta mag es Sprengerle,
do leckt sich's Mäusle d'Fengerle.
Kascht noch so guat des Sach verstecka,
des Mäusle wird es gwiaß entdecka.

An Weihnachtgsguatsle sich zu laba,
scheut sich's net, ganz tief zu graba.
Im Bücherschrank, ganz hinta dromma,
isch's scho oft an Guatsle komma.

Im Besaschrank au, ganz tief onta,
hots Mäusle scho Versteckle gfonda.
Im Gänsebräder, onterm Bett,
hinter onserm Biegelbrett....

Noch an viele andre Orte
isch's Weihnachtsmäusle fündig worde.
Drom han zu meiner Frau i gsait:
»Jetzt ischt jo wieder Mäusleszeit.

'S Weihnachtsmäusle will au leba,
back a bissle meh, fürs Mäusle eba!«
No hot se gmoint, des wär vergeudet
ond hot bloß auf mei Bäuchle deutet:

»I kenn des Weihnachtsmäusle g'nau –
ond lieber Ma, du kennscht es au!«

Zurück